Os elefantes barritan, non barruntan

Certo día nunha reunión de intelectuais tiven o infortunio de dicir que os elefantes barruntaban. Ante tal erro léxico un biólogo estoupou a rir e con malicia díxome que o que fan os paquidermos narigóns é barritar, non barruntar.

Anos máis tarde, cando meu Gato volveu da súa viaxe polo Mundo Adiante conteille a miña anécdota. Atónito, miroume con ollos de sabio e dixome: “Os elefantes barritan si, pero tamén barruntan. Levan barruntando dende hai moito tempo que os homes iades escarallar a Terra”